Көмүр жеткирүү үчүн өткөрүлгөн тендер боюнча Башкы прокуратуранын башкаруу бөлүмүнүн башчысы 2 айга камакка алынды

Башкы прокуратуранын башкаруу бөлүмүнүн башчысы 2 айга камакка алынды. Бул тууралуу Жогорку Соттун басма сөз кызматы бүгүн, 30-сентябрда билдирди.

Маалыматка караганда, мындай чечимди Бишкек шаарынын Биринчи Май райондук соту чыгарган. Эми Нуртазин Жетибаев 27-ноябрга чейин Улуттук коопсуздук мамлекеттик комитетинин тергөө абагында болот.

Айта кетсек, Нуртазин Жетибаев үстүбүздөгү жылдын 27-сентябрында кармалган. Ал “Электр станциялары” ишканасынын коопсуздук кызматынын жетектөөчү адиси Турсунбек Мамбеталиев жана Экономикалык кылмыштуулукка каршы күрөшүү боюнча мамлекеттик кызматынын 1-бөлүмүнүн кызматкери Марсбек Маданбеков менен биргеликте Бишкек жылуулук электр борборуна көмүр жеткирүү үчүн өткөрүлгөн тендерде казакстандык “Жезказган энергия сатуу” ишканасынын кызыкчылыгын коргогон.