Депутаттар Балыкчы-Каракол унаа жолун этап-этабы менен оңдоо сунушун айтышты

Бүгүн, 30-сентябрда Каракол шаарында парламенттин Транспорт, коммуникация, архитектура жана курулуш комитети көчмө жыйын өткөрүп, Балыкчы-Каракол жолун оңдоо маселесин карашты. Жолдорду тейлөө департаментинин башчысы Жумаш Соодонбаевдин айтымында, Балыкчы-Каракол жолу толугу менен оңдоону талап кылат. “Республикалык бюджеттин таңсыктыгынан улам аталган автожол бүгүнкү күнгө чейин капиталдык оңдоодон өткөрүлбөйт келет, болгону үстүртөн оңдоп-түзөп келебиз”,- дейт ал.

Комитет төрагасы Жусупали Исаев Транспорт министрлигине жолдорду реконструкциялоону этап-этабы менен жүргүзүү вариантын караштырууну сунуш кылды. Анын айтымында, мындай узундуктагы жолду калыбына келтирүүгө көп акча жумшалат, андыктан долбоорду белгилүү бир фазаларга бөлүү керек.