Бишкекте мас абалында жарандардын тынчын алган милиционер айым боюнча кызматтык иликтөө жүргүзүлүүдө

Бишкекте мас абалында жарандардын тынчын алган милиционер айым боюнча кызматтык иликтөө жүргүзүлүүдө. Бул тууралуу Бишкек ШИИББинин басма сөз кызматы бүгүн, 6-октябрда билдирди.

Маалыматтарга караганда, 11-кичи райондогу үйлөрдүн бириндеги батирди ижарага алып жашаган Х.В. аттуу жаран милицияга кайрылып, үйүнө мас абалындагы айым жана 2 эркек кирүүгө аракеттенип ызы-чуу чыгарып, 10 миң АКШ доллар карызын беришин талап кылып жатышканын кабарлаган. Аталган дарек менен милиция кызматкерлери барышып, чыр салып жаткан айымды жана анын жанындагы 2 жаранды наркологиялык борборго алып келишкен. Ал жерден айымдын мас экендиги аныкталган. Бирок ал өзүнүн атын эмес, башка эле ысымды айтып койгон. Кийин иликтөөдө аталган айым Н.Рузиева аттуу милициянын майору экендиги аныкталган. Чынында эле Н.Рузиеванын апасына П.В. аттуу адам карыз болгон. Бирок ал башка жакка көчүп кетип, анын жашаган жеринде жогоруда милицияга кайрылган Х.В. жашап жаткандыгы аныкталган. Н.Рузиева жумуштан кийинки мезгилде жогорудагы окуяга кабылган.   

Милициянын майору болгон Н.Рузиеванын кандай жоопкерчилик тартары кызматтык иликтөөнүн аякташы менен белгилүү болору маалымдалды.