Көк-Суу жайлоосунда ашууда калган 7 чабандын абалы белгисиз бойдон калууда

Көк-Суу жайлоосунда 2000 баш кою менен ашууда калган 7 чабандын абалы белгисиз бойдон калууда. Бул тууралуу ӨКМнын басма сөз кызматы бүгүн, 9-октябрда билдирди.

Маалыматка караганда, Сузак районундагы Барпы айылдык аймагына караштуу Беш-Мойнок жана Түрк-Абад айылдарынын чабандары (7 адам) 2000 баш кою менен Нарын облусунун Ак-Талаа районунун Көк-Суу жайлоосунда кар калың жаагандыктан, ашуудан малдарын айдап өтө албай калышкан. Азыркы убакта ашуудан өтүү мүмкүн болбогондуктан, чабандардын абалы белгисиз. Кечээ, 8-октябрь күнү чабандардын жакындарынын кайрылуусунун негизинде Кыргыз Республикасынын Өзгөчө кырдаалдар министрлиги Кыргыз Республикасынын Куралдуу күчтөрүнүн Генералдык штабына Коргоо министрлигинин тик учагын пайдалануу үчүн атайын кат жолдогон. Жогорудагылардын негизинде Ак-Талаа районунун Көк-Суу жайлоосунан чабандарды тез аранын ичинде алып чыгуу максатында 2014-жылдын 9-октябрында  Кыргыз Республикасынын Коргоо министрлигине караштуу МИ-8 тик учагын учуруу иш-чаралары көрүлүүдө.