Бишкекте эртең Шаар күнү белгиленип, эски аянтта спорттук оюндар өткөрүлөт

Эртең, 11-октябрда Бишкектин 136 жылдыгы белгиленип, майрамдык иш-чарада спорттук оюндар өткөрүлөт. Бул тууралуу борбордун мэриясынын басма сөз кызматы билдирди.

Маалыматка ылайык, саат 11:00дө эски аянтта спорт боюнча Бишкек шаардык комитети тарабынан көркөм гимнастика, таэквондо, дзюдо, оор атлетика, күрөш, грек-рим күрөшү боюнча көрсөтмө оюндар уюштурулат.

Мындан тышкары иш-чаранын жүрүшүндө армрестлинг, стол үстүндөгү теннис, шахмат, тогуз коргоол, ордо, аркан тартыш боюнча мелдештер өтүп, жеңүүчүлөр баалуу белектер менен сыйланат. Жалпысынан майрамдык иш-чарага 2 миңге жакын адам катышмакчы.