Кыргызстан экономикалык көз карандысыздык боюнча рейтингде 151 өлкөнүн ичинен 90-орунду ээлеп, өткөн жылдагыдан 13 орунга алдыга жылды

Кыргызстан “Дүйнөдөгү экономикалык көз карандысыздык - 2014” рейтинги боюнча 90-орунду ээледи. Бул тууралуу бүгүн, 13-октябрда канадалык Фрейзер институтуна шилтеме берүү менен КАФМИ изилдөөчү борбору жарыялады.

Маалыматка ылайык, аталган тизмеде 151 мамлекет бар. Былтыр Кыргызстан 103-орунда болчу. “Республиканын мындай көтөрүлүшүнө анын экономикасынын өнүгүп кетиши эмес, башка мамлекеттердин начарлап кетиши себеп болду”,- деп жазды аталган борбор.

Айта кетсек, бул рейтингдин чокусунда Гонконг административдик району жайгашты. Андан кийин Сингапур, Жаңы Зеландия жана Швейцария орун алышты. АКШ 12-орунду ээлесе, Орусия 98-орунда жайгашты.

Экономикалык көз карандысыздыктын деңгээлин аныктоодо төмөнкү тармактар эске алынат: өкмөттөрдүн өлчөмү, жеке менчикти коргоо, тышкы сооданын көз карандысыздыгы, насыя берүү системи жана башкалар.