Бишкекте Баткен окуясы эскерилди

Бүгүн, 26-октябрда “Аскердик каармандык” монументинин жанында 1999-2000-жылдарда өлкөнүн бүтүндүгүн коргоодо аскердик милдетин аткарып жатып курман болгон жоокерлерди эскерүү митинг-реквиеми болуп өттү. Ага Куралдуу күчтөрдүн Генералдык штабынын башчысы, генерал-майор Асанбек Алымкожоев, КРнын Коргоо министри, генерал-майор Абибилла Кудайбердиев, жоокер-баткенчилер, курман болгондордун ата-энелери жана жакындары катышышты.

“Ошол окуяда менин балам да каза тапкан. Бүгүн аны эскерүү үчүн келип отурам. Эми согуш болбосун, ушул акыркысы болсун. Ата-эне, жубайлар, балдар сыздабасын”,- дейт Баткен окуясында каза болгон Замирбек Күчөрбаевдин апасы Токтокан Дайрабаева.

“26-октябрь Баткен окуясында курман болгон жоокерлерди эскерүү күнү болуп эсептелет. Ушул күндү экинчи жылы белгилеп жатабыз. Кыргызстандын бардык аймактарынан делегациялар келишти. Согуш болбосун. Биз мекенди коргогонго, сактаганга дайым даярбыз”,- дейт Баткен согушунун катышуучуларынын республикалык комитетинин төрагасы Сатыбек Молдалиев.

Митинг-реквиемден кийин И.Панфилов атындагы эс алуу багында Баткен окуясынын 15 жылдыгына арналган концерт уюштурулуп, митингдин катышуучуларына жана меймандарга жоокер боткосу берилди.