Барак Обама Крымды Украинага кайтарып берүүгө жардамдашарын убада кылды

АКШнын президенти Барак Обама Крымды Украинага кайтарып берүүгө жардам берерин убада кылды. Бул тууралуу Обама кечээ, 27-октябрда Украинадагы шайлоонун жыйынтыгы тууралуу өз пикирин билдирип жатып айтты. “Америка Украинанын аймактык бүтүндүгүн жана эгемендүүлүгүн сактоого, ошондой эле тынчтык жолу менен Крымды Украинага кайтаруу боюнча колдоону улантат”,- деди ал.

Америка лидери АКШ украин элинин демократиялык келечекти куруу боюнча чечимин колдой турганын айтты. “Орусияны колдогон жикчилдердин көзөмөлүнөн улам Донбасста көптөгөн украиналыктар кезексиз шайлоодо добуш берүү мүмкүнчүлүгүнөн ажырап калышты. Бирок мындай шартка карабай өлкөнүн башка региондорунда миллиондогон украиндер уюшумдуу болуп, шайлоого бара алышты. АКШ украин элинин өнүгө турган демократиялык келечекти куруу боюнча чечимин колдойт”,- деп билдирди ал.