Гейлер жана лесбиянкалардын уюму Турсунбай Бакир уулунун айыптоосун четке какты

Кыргызстандагы ЛГБТИКС (лесбиянкалар, гейлер, бисексуалдар, трансгендерлер, интерсексуалдар, квирлер, союзниктер) “Лабрис” уюму депутат Турсунбай Бакир уулунун ысымы менен ачылган bakiruulu.com сайтына эч кандай тиешеси жок экенин билдирди. Муну аталган уюм бүгүн, 28-октябрда өз интернет баракчасы аркылуу жарыялады.

“Жаңы ачылган сайт Кыргызстандагы көптөгөн жана ар түрдүү ЛГБТИКС уюмдардын расмий баракчасы болушу мүмкүн эмес. Мындан улам бул тууралуу арыздар тиешелүү түзүмдөргө жөнөтүлөт”,- дешти “Лабрис” уюмунан.

Эскерте кетсек, бүгүн өлкөдөгү гейлер уюму Турсунбай Бакир уулунун ысымы менен сайт ачып, анын башкы бетине гейлердин сүрөттөрүн илишкени белгилүү болгон. Депутат бул тууралуу SUPER.KG порталына "булар мага согуш жарыялашты, мен коркпойм, согушту кабыл алам" деп түшүндүргөн.