Япониянын ЖОЖдорунда билим алуу үчүн 2013-2014-окуу жылына кыргызстандык жарандарга 15 орун бөлүнгөн

28-январда КРнын Мамлекеттик кадр кызматынын жетекчиси Аалы Карашев 2013-2014-окуу жылында Япониянын ЖОЖдорунда билим алуу үчүн тандалган кыргызстандык талапкерлер жолугушууга келген япониялык профессорлор менен жолугушту. Бул тууралуу аталган кызматтан кабарланды. Жолугушууда белгилүү болгондой, 2013-2014-окуу жылында Япониянын жогорку окуу жайларында билим алуу үчүн Кыргызстанга 15 орун бөлүнгөн. Ал эми 2007-жылдан бери Японияга 6 топтон турган 101 мамлекеттик жана муниципалдык кызматкер окууга жөнөтүлгөн. Алардын ичинен 67 кызматкер илимий диссертацияларын ийгиликтүү жакташып, магистр даражасын алышкан. Учурда аталган өлкөдө 29 стипендиант билим алып жатканы белгилүү болду.