Ош шаарындагы Араван-Ак-Буура каналынан баштыкка салынган кызыл түстөгү белгисиз порошок табылды

Ош шаарындагы Араван-Ак-Буура каналынан баштыкка салынган кызыл түстөгү белгисиз порошокту алып чыгышты. Бул тууралуу бүгүн, 30-октябрда ӨКМнын басма сөз кызматынан билдиришти.  

Маалым болгондой, 29-октябрь күнү саат 15:35 чамасында шаардын Набережная көчөсү менен Мушкетова көчөсүнүн кесилишкен жеринде, Араван-Ак-Буура каналында кызыл түстөгү суюктук агып жатканын айтып, ошол жердин жашоочулары кайрылышкан.

Аталган дарекке ӨКМнын Ош шаардык башкармалыгынын калкты жана аймакты коргоо бөлүмүнүн кызматкерлери жана Шаардык санитардык-эпидемиологиялык көзөмөлдөө борборунун адиси Кубаныч Жумабаев бирге келип, окуяны жеринде иликтешкен. Ошондой эле Ош шаардык куткаруу кызматынын куткаруучулары куткаруучу шаймандардын жардамында сууга түшүп, болжол менен 10 килограммдык баштыктагы кызыл түстөгү порошокту алып чыгышкан. Аны Төлөйкөн айыл өкмөтүнүн башчысынын милдетин аткаруучу А.Көкүлов аркылуу Ош шаардык санитардык-эпидемиологиялык көзөмөлдөө борборунун адиси Кубаныч Жумабаевге беришкен. Учурда иликтөө иштери жүрүүдө.