Кечээ Таласта нааразычылык акциясына 350дөй адам чогулду

Кечээ, 30-октябрда Талас шаарында "Кыргыз чоролору" коомдук бирикмеси тарабынан уюштурулган нааразычылык акциясы болуп өттү. Бул тууралуу аталган кыймылдын мүчөсү Замирбек Көчөрбаев билдирди.

Анын айтымында, жалпы 350дөй жергиликтүү чоролор келип, жарымы нааразычылык акциясын өткөзүшсө, калган бөлүгү "Шыраалжын" тоо кенин чалгындоого каршы акция уюштуруп, камалган балдардын өтүп жаткан Талас шаардык сотуна катышышты.

Белгилүү болгондой, нааразычылык акциясында төмөнкү талаптар коюлду:

1. Буурчак сатуу баасы эл аралык базар баасына ылайык келтирилсин.

2. Талас облусунун аймагына караштуу тоо кен байлыктарын чалгындоо, казып-иштетүү иштерине 3 жылга мораторий жарыялансын.

3. Казакстанга чектеш аймактардагы такталбаган же талаш-тартышты жаратып келген чек ара маселелери жергиликтүү элдин кызыкчылыгын эске алуу менен тез арада чечилсин.

4. "Шыраалжын" кенин чалгындоого каршы чыккан нааразычылык акциясынын катышуучуларына куугунтуктоо иши токтотулуп, аларга карата мыйзамсыз козголгон иштер кыскартылсын.

5. Электр энергиясынын баасы өзгөрүүсүз калып, чектөөлөр токтотулсун жана электр энергиясын кризиске алып барган тиешелүү кызмат адамдары жоопко тартылсын.

Уюштуруучулар жогорудагы талаптардын жакынкы арада өтө турган Талас элинин курултайына чейин аткарылышын талап кылышты.