Жогорку Кеңештин депутаты Урмат Аманбаевага “коррупция” беренеси боюнча кылмыш иши козголду

Башкы прокуратура тарабынан Жогорку Кеңештин депутаты Урмат Аманбаевага “коррупция” беренеси боюнча кылмыш иши козголду. Бул тууралуу Башкы прокуратуранын басма сөз кызматы бүгүн, 3-ноябрда билдирди.

Маалыматка караганда, эл өкүлү Ош облусундагы Кургак учук менен күрөшүү борборунун башкы эсепчиси болуп турган убагында мыйзамсыз киреше алуу максатында топ түзгөн. Анын карамагына аталган борбордун директору А.Б., ошол эле борбордогу дарыкананын башчысы Ф.Ш., “Б.” ишканасынын директору М.У. жана башка адамдар кирген.

Аманбаеванын талабынын негизинде аталган борбордун медайымдары дарыканадан алынуучу кургак учукка каршы маанилүү препараттардын жана дезинфекциялык каражаттардын санын жогору кылып көрсөтүшкөн. Ал препараттар менен дезинфекциялык каражаттарды “Б.” ишканасы алып келип берет деген шылтоо менен бюджеттен бөлүнгөн акча ишкананын эсебине которулган. Кийин ал акча каражаттарын Урмат Аманбаева жана топ мүчөлөрү өз ара бөлүп алышчу. Мындай коррупциялык көрүнүш 2009-жылдан 2013-жыл аралыгына чейин жүрүп келген. Анын кесепетинен мамлекет 17 миллион 263 500 сом зыян тарткан.

Бул иш боюнча депутат айым бир канча жолу прокуратурага чакырылган, бирок эл өкүлү келген эмес. Учурда ал “Ош-Кардио” медициналык борборунда дарыланууда.

Ал эми кылмыш иши прокуратуранын Тергөө башкармалыгына өткөрүлүп берилди.