Жогорку Кеңештин депутаттары Бишкектин тазалыгына нааразы

Парламент депутаттары Бишкектеги арыктарга курулуш таштандыларынын төгүлүп жатканына нааразы. Муну депутат Мамытбай Салымбеков Жогорку Кеңештин Агрардык саясат, суу ресурстары, экология жана региондук өнүгүү комитетинин 10-ноябрдагы жыйынында айтып чыкты. Салымбеков биринчи вице-премьер-министр Тайырбек Сарпашевге: "Шаардын тегерегиндеги курулуш таштандылары арыктарда жатат. Ушуну Курулуш агенттиги көзөмөлгө алабы? Бул эмне деген баш аламандык?"- деп кайрылды.

Депутат Анарбек Калматов курулуш таштандылары бир эле арыктарда эмес, көчөдө да төгүлүп жатканын айтса, комитет төрагасы Сайдулла Нышанов "буга мэр Кубанычбек Кулматовдун иштебей жатканы себеп болууда" деп кошумчалады.