Түштүк Кореяда чөгүп кеткен “Севоль” кемесинин капитаны 36 жылга эркинен ажыратылды

Түштүк Кореяда чөгүп кеткен “Севоль” кемесинин капитаны 36 жылга эркинен ажыратылды. Бул тууралуу 11-ноябрда чет элдик басылмалар жазып чыгышты. 

Буга чейин 69 жаштагы Ли Чжун Сок өлүм жазасына тартылышы мүмкүндүгү айтылып жаткан. Айыптоочу да өлүм жазасына тарта турган өкүмдү сураганы белгилүү болду. Кеменин капитаны адам өмүрүн алып кеткен өзгөчө кырдаал учурунда шалаакы мамилеси үчүн күнөөлүү деп табылды. Бирок "адам өлтүрүү" беренеси боюнча акталды. Жакынкы күндөрдө экипаждын калган 4 мүчөсүнө да сот өкүм чыгарат. 

Эске салсак, 16-апрель күнү Түштүк Кореяда жүргүнчүлөрдү ташуучу кеме чөгүп кеткен. Анда 476 адам болгон. Алардын басымдуу бөлүгүн мектеп окуучулары түзгөн. Кырсыктын кесепетинен 295 адам набыт болуп, дагы 10 адам дайынсыз деп изделип жаткан. Бүгүн, 11-ноябрда Түштүк Корея мамлекетинин өкмөтү дайынсыздарды издөөнү токтотуу чечимин кабыл алганы маалым болду. Чөккөн кеме боюнча жүргүзүлгөн тергөө иштеринин жүрүшүндө экипаждын мүчөлөрү кемени биринчилерден болуп таштап кеткендиги аныкталган.