Төрөө мүмкүнчүлүгүнөн ажыратуучу операциядан кийин Индияда 13 аял каза тапты

Төрөө мүмкүнчүлүгүнөн ажыратуучу операциядан кийин Индияда 13 аял каза таап, операция жасаган дарыгер камакка алынды. Бул тууралуу 13-ноябрда чет элдик басылмалар жазып чыгышты.

Маалыматка караганда, 59 жаштагы дарыгер Мадхья-Прадеш штатында колго түшүрүлгөн. Ал журналисттерге күнөөлүү эместигин, операциялары ийгиликтүү аяктаганын билдирген. Ал эми аялдар колдонуу мөөнөтү бүткөн дарыларды ичип көз жумушканын кошумчалаган. Өкмөт дарыгер атаган дарыларды иликтөө иштери бүткөнгө чейин сатууга тыюу салган. 

Белгилүү болгондой, Гупта аттуу дарыгер 8-ноябрь күнү 8 сааттын ичинде 80ге жакын аялга операция жасаган. Алардын 13ү каза болсо, 20дай аялдын абалы оор. Дарыгерге карата "кызмат абалындагы шалаакылык" беренеси боюнча кылмыш иши козголуп, тергөө амалдары жүрүүдө.