"Депутат Урмат Аманбаевага "коррупция" беренесинин тагылышы туура" деди башкы прокурор

Кылмыш иши козголгон депутат Урмат Аманбаевага "коррупция" беренесинин тагылышы туура. Мындай пикирди Жогорку Кеңештин 13-ноябрдагы жыйынында башкы прокурор Аида Салянова айтып, себебин депутаттарга түшүндүрүп берди. Салянова депутат Аманбаевага байланышкан кылмыш ишинин материалдарынан мисал кылып буларды айтты: "Урмат Аманбаева Ош облустук кургак учукка каршы күрөшүү борборунун башкы эсепчиси болуп турганда бюджеттин эсебинен алынчу дары-дармектердин көлөмүн көбөйткөн. Мунун айынан мамлекетке 17 миллион 263 500 сом зыян келтирилген. "Коррупция" беренесин тергөөчү койду, бирок мен муну туура деп эсептейм".