Кыргызстандан Орусияга кеткен автобус бузулуп, анын 44 жүргүнчүсү 3 күн токойдо жашашканы айтылды

Кыргызстандан Москвага сапар тарткан Мерседес үлгүсүндөгү автобус жолдон бузулуп, анын жүргүнчүлөрү 3 күн бою токойдо жашашкан. Автобуста жалпы 44 жүргүнчү, анын ичинен үчөө жаш балдар болгон. Алар Златоуст шаарына жакын жайгашкан токойдо жашашкан. Бул тууралуу бүгүн, 14-ноябрда орусиялык маалымат каражаттары жазып чыгышты.

Белгилүү болгондой, орто жолдон жүргүнчүлөрдү алып бара жаткан автобустун кыймылдаткычы бузулуп калган. Аны айдоочу менен жүргүнчүлөр өздөрү оңдоого аракеттенишип, 3 күн бою токойдо жашаганга туура келген. 

Аталган жолдон өткөн айдоочу окуя тууралуу куткаруучуларга айтып берген. Натыйжада аталган жерге куткаруучулар келип, унаада үшүгөн жүргүнчүлөрдү Златоуст шаарындагы мектеп-интернатка жеткирип, аларга ысык тамак уюштурушкан. Ал эми автобустун айдоочусу Челябинск шаарына барып керектүү тетиктерди сатып алып унаасын оңдогон соң, алар кайрадан жолго чыгышкан.