Мамлекеттик тарых музейинин артындагы иши токтогон фонтандын орду таштандыга толуп калган

Кыргыз мамлекеттик тарых музейинин алды болгон борбордук “Ала-Тоо” аянты учурда түрдүү муундун, түрдүү улуттун өкүлдөрүнүн жолугушчу жайы экени белгилүү. Ал жайда сүрөткө түшкөндөр, ошол тегеректе сейилдегендер, велосипед тээп көңүл ачкандар көп. Бул бир кезде тегереги толугу менен оргума суулар (фонтан) курчап, керемет кооздукка ээ болгон музейдин алдынан карагандагы көрүнүш. Ал эми аталган музейдин артындагы мурунку оргума орун алган жай учурда акыр-чикирге толуп жатат. Башкы музейдин артындагы бул көрүнүш көпчүлүктү ирээнжитери бышык. Суусу да, иши да токтоп, бир топ убакыттан мурунку кооздугун жоготкон бул жайдан азыр таштандыларды, дат баскан темирлерди гана көрүүгө болот. Башка аянттардагы оргумаларда да суу токтогон, бирок алардан тазалыктын сакталганын көрүүгө болот.