Футбол боюнча Өлкө чемпиондугунда "Абдыш-Ата" мөөнөтүнөн мурда чемпиондукту камсыз кылып койгон "Дордойду" жеңип алды

Кечээ 5-ноябрда футбол боюнча Өлкө чемпиондугунун (ТОП-Лига) алкагында 2 беттеш өткөрүлдү. Кантта жергиликтүү "Абдыш-Ата" бишкектик "Дордойду" кабыл алып, 1:0 эсебинде жеңишке жетишти. Бул жеңилүү мөөнөтүнөн мурда чемпиондукту камсыздап койгон "Дордой" үчүн сезондогу 2-жеңилүү болду (1-айлампада "Алгага" 2:0 эсебинде жеңилген). Ал эми Бишкектеги Д.Өмүрзаков атындагы стадиондо өткөн оюнда "Алга" менен "Динамо ИИМ" беттешип, 0:0 эсебинде тең чыгуу катталды. Ошентип, "Алай", "Алга", "Абдыш-Ата" жана "Динамо ИИМ" командаларынын ортосунда күмүш жана коло медалдар үчүн күрөш уланууда.