Оперкызматкерди аткан кылмышкер качып кеткен абактын жетекчилери кызматтарынан бошотулушту

Бишкек милициясынын оперкызматкерин атып өлтүргөн Александр Сояпин качып кеткен абактын жетекчилери ээлеген кызматтарынан бошотулушту. Бул тууралуу бүгүн, 20-ноябрда жаңы абактын ачылышында Жазаларды аткаруу мамлекеттик кызматынын төрагасы Советбек Арбаев билдирди.

“Азыркы учурда А.Сояпин мыйзамсыз курал-жарак алып жүргөнү үчүн 4 жылга соттолуп, жатак-абакка мыйзамсыз которулганы аныкталды. Анын жатак-абакка которулушуна тиешеси бар №32-абактын 4 кызматкери кызматтан алынды. Учурда бул иш боюнча кызматтык иликтөө иштери жүрүүдө”,- дейт С.Арбаев.

Эске салсак, 42 жаштагы Александр Сояпин 11-октябрда түрмөдөн качып кеткенден бери издөөдө жүргөн. Ал эми 14-ноябрь күнү аны кармоо учурунда ал куралдуу каршылык көрсөтүп, шаардык милициянын 28 жаштагы Б.Сыдыгалиев аттуу оперкызматкерине ок чыгарып, ал окуя болгон жерден каза тапкан.