Ошто мектепке чейинки билим берүү мекемелеринде жугуштуу оорунун алдын алуу боюнча иштер жүрүүдө

Күз айларындагы аба ырайынын өзгөрүшүнө байланыштуу жугуштуу суу чечек оорусунун өрчүп кетүү коркунучун алдын алуу максатында Ош шаардык билим берүү башкармалыгы бир нече иш-чараларды бекитти. Анда мектепке чейинки билим берүү мекемелеринин кызматкерлерине жугуштуу оорулардын жугуп калуу коопсуздугун күчөтүү жөнүндө түшүндүрүү иштери жүргүзүлүүсү зарыл экендиги белгиленди. Бул тууралуу аталган башкармалыктан кабарлашты. 

Маалыматка ылайык, ата-энелерге жана тарбиялануучуларга “Суу чечек жана анын алдын алуу” деген темада аңгемелешүү уюштуруп, балдар бакчасына келбей калган баланын ата-энеси менен байланышып, ооруп калуу себептери болсо, тез арада үй-бүлөлүк дарыгерлерге кабарлоо керек. Оорунун алдын алуу максатында ар бир мектепке чейинки мекемелерде санитардык бюллетендерди чыгаруу талап кылынат.   

Бул иш-чара Ош шаардык оорулардын алдын алуу жана мамлекеттик санитардык көзөмөлдөө борборунун жиберген эскертмесинин негизинде жүрүп жатат.