Ош. Эстакадалык көпүрөнүн курулушуна жарандардын кошкон салымын жок кылганы үчүн мурдагы вице-мэрге кылмыш иши козголду

Кечээ, 20-ноябрда Ош ШИИБинин тергөө бөлүмү Ош шаарынын мурдагы вице-мэри Дастан Ходжаевдин үстүнөн КРнын Кылмыш-жаза кодексинин "кызматтык абалынан кыянаттык менен пайдалануу", "ишенип берилген мүлктү өзүнө ыйгарып алуу же жок кылуу" беренелери боюнча кылмыш ишин козгоду. Бул тууралуу Ош шаардык ички иштер башкармалыгынын басма сөз кызматы билдирди.

Маалыматка караганда, кылмыш иши шаардагы эстакадалык көпүрөнүн курулушуна жарандардын кошкон салымдары жок болуп кеткендигинен улам козголгон. "Жарандардын түздөн-түз көрсөтмөсүнө ылайык кылмыш иши козголду. Ош ШИИБинин 5-бөлүмү бул багытта иш жүргүзүп жатат. Кимде-ким дагы ушундай салымдарды кошкон болсо, 0557 20-79-20 номерине кабарлап коюшуңуздарды суранабыз. Мурдагы вице-мэр тергөө бөлүмүнө суракка чакырылат",- деп айтылат маалыматта.