Бүгүн Канжар Кадыралиевдин жактоочулары Ош облустук администрациясына барышты

Бүгүн, 24-ноябрда Канжар Кадыралиевдин жактоочулары Ош облустук администрациясына барышты. Бул тууралуу К.Кадыралиевдин апасы Акдаана Кочкорова билдирди.

Анын айтымында, 20га жакын Өзгөн районунун аксакалдары жана туугандары Ош облусунун губернаторуна барышып, Канжар Кадыралиевдин ишин эки тараптуу, калыс кароону суранышууда. Ошондой эле Акдаана Кочкорова бул эч кандай митинг же акция эмес экенин кошумчалады. Айрым катышуучулардын айтымында, учурда чогулгандардын саны 200гө чукулдады, дагы да келгендер болууда. Учурда жактоочулар облус башчысынын кабыл алуусун күтүп жатышат. 

Буга чейин Ош шаардык соту тергөөгө келбегендигине байланыштуу К.Кадыралиевди камакка алуу чечимин чыгарган. Ошол эле күнү соттун бул токтомунун негизинде ага издөө жарыяланган. Ош облустук ички иштер башкармалыгынын маалыматы боюнча, К.Кадыралиев Өзгөн районундагы жана Ош шаарындагы туруктуу жашаган жерине 17-ноябрдан бери келе элек. Учурда анын кайда экени белгисиз.

Ал эми Башкы прокуратура Ош шаардык прокуратурасынын кызматкери Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен талап кылуу” беренелери боюнча кылмыш ишин козгоп, ээлеп турган кызматынан бошоткон эле.

Айта кетсек, Канжар Кадыралиевден жапа тартканын айтышкан Сактан Келдибаевдин ата-энеси жана бир туугандары 10-октябрда Бишкекте маалымат жыйын өткөрүшкөн. Анда Канжар Кадыралиевдин ишкерди коркутуу жолу менен кафель чыгарган заводун тартып алууну көздөп жатканын айтышкан эле. Ошондой эле ишкер менен Канжар Кадыралиевдин телефондогу сүйлөшүүлөрү интернетке тараган.