Ош: Облус башчысы Канжар Кадыралиевдин жактоочуларын кабыл алды

Өкмөттүн Ош облусундагы өкүлү Сооронбай Жээнбеков Ош шаардык прокуратурасынын мурдагы кызматкери Канжар Кадыралиевдин жактоочуларын кабыл алды. Бул тууралуу К.Кадыралиевдин агасы Орунбек Кадыралиев бүгүн, 24-ноябрда билдирди.

Анын айтымында, Өзгөн районунун айыл аксакалдары, К.Кадыралиевдин туугандары облус башчысынын кабыл алуусунда болушкан. Анда маалымат бир тараптуу берилип жатканы, ишти мыйзам чегинде кароо маселелери айтылган.

Буга чейин Ош шаардык соту тергөөгө келбегендигине байланыштуу К.Кадыралиевди камакка алуу чечимин чыгарган. Ошол эле күнү соттун бул токтомунун негизинде ага издөө жарыяланган. Ош облустук ички иштер башкармалыгынын маалыматы боюнча, К.Кадыралиев Өзгөн районундагы жана Ош шаарындагы туруктуу жашаган жерине 17-ноябрдан бери келе элек. Учурда анын кайда экени белгисиз.

Ал эми Башкы прокуратура Ош шаардык прокуратурасынын кызматкери Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен талап кылуу” беренелери боюнча кылмыш ишин козгоп, ээлеп турган кызматынан бошоткон эле.

Айта кетсек, Канжар Кадыралиевден жапа тартканын айтышкан Сактан Келдибаевдин ата-энеси жана бир туугандары 10-октябрда Бишкекте маалымат жыйын өткөрүшкөн. Анда Канжар Кадыралиевдин ишкерди коркутуу жолу менен кафель чыгарган заводун тартып алууну көздөп жатканын айтышкан эле. Ошондой эле ишкер менен Канжар Кадыралиевдин телефондогу сүйлөшүүлөрү интернетке тараган.