Башкы прокуратура: "Жабырлануучу тосмо арыз жазып берген күндө да, Кадыралиевдер боюнча кылмыш иши өндүрүштөн кыскартылбайт"

Кадыралиевдердин иши тергелүүдө. Бул тууралуу бүгүн, 24-ноябрда Башкы прокуратуранын басма сөз кызматы билдирди.

Буга чейин жабырлануучу Бекташовдун Кадыралиевдердин иши боюнча тосмо арыз жазып бергени айтылган эле. Мындан улам айыпталуучулардын жакындары кылмыш ишин өндүрүштөн кыскартууну суранышкан. Ал эми Башкы прокуратура жабырлануучу тосмо арыз жазып берген күндө да, кылмыш иши өндүрүштөн кыскартылбай тургандыгын билдирди. Себеби аларга коюлган берене оор кылмыштардын катарына кирет.

Айта кетсек, жабырлануучу Абдимитал Бекташов прокуратурага арыз менен кайрылган. Анда ал Канжар жана Улан Кадыралиевдер баласы экөөнү ок атуучу курал менен коркутуп, сабап, 2004-жылдан бери ижарага алып иштетип келген 3 гектар жерин талашып, мыйзамсыз колдонуп келгенин айткан. Бул боюнча 14-ноябрь күнү Башкы прокуратура “ээн баштык”, “өзүм билемдик” жана “опузалап талап кылуу” беренелери боюнча кылмыш ишин козгогон.