Райкан Төлөгөнов: "Ар бир тыйынды натыйжалуу пайдалануу - министрликтердин ишинин негизги көрсөткүчү"

Жогорку Кеңештин Отун-энергетика комплекси жана жер казынасын пайдалануу комитети 25-ноябрда өлкөнүн 2013-жылкы республикалык бюджетинин аткарылышын карады. Мындан тышкары 2013-жылкы бюджет боюнча жүргүзүлгөн аудит боюнча Эсептөө палатасынын маалыматын укту. Каржы министринин орун басары Алмаз Бакетаев 2013-жылы экономикалык өсүш "Кумтөр" кенин эсепке албаганда 5,8 пайызды түзгөнүн айтты. "Былтыр орточо айлык акынын суммасы 11 426 сомду түздү",- дейт Бакетаев. 

Эсептөө палатасынын төрайымы Эльмира Ибраимова республикалык бюджеттин чыгаша бөлүгүнүн аткарылышы 95 пайыздык деңгээлди түзгөнүн билдирди. Жыйынды депутаттар Эсептөө палатасы энергетикалык тармакта дыкат аудит жүргүзүп чыгышы керектигин белгилешип: "Электр энергиясын сатып алууда, сатууда ири коррупциялык схемалар бар экени байкалууда",- дешти. 

Депутат Райкан Төлөгөнов Эсептөө палатасынын негизги милдети бюджеттик каражаттарды министрликтердин канчалык эффективдүү пайдаланып жатканына мониторинг жүргүзүү экенин белгилеп буларды айтты: "Ар бир тыйынды натыйжалуу пайдалануу - министрликтердин ишинин негизги көрсөткүчү, министрлердин иш-аракетинин жыйынтыгы".