Бишкекте өлкөдөгү диний окуу жайлардын жетекчилерине арналган семинар-жыйын өтөт

Кыргызстан мусулмандарынын дин башкармалыгы Бишкек шаарында 28-30-ноябрь аралыгында республика боюнча диний окуу жайлардын мүдүрлөрү үчүн “Диний билим берүүнүн жаңы концепциясы жана окутуунун бирдиктүү программасын чыңдоо” деген аталыштагы семинар-жыйын өтөт. 

Муфтияттын басма сөз кызматынан билдиришкендей, семинар-жыйында төмөнкү маселелер каралмакчы:

-Окуу тарбия иштеринин жүрүшүнө баа берүү;

-Бирдиктүү окуу программасынын ишке ашырылуусу;

-Окуу жай мекемелериндеги финансылык иштерди жөнгө салуу;

-Окуу иштерине байланышкан иш-чараларды тартиптештирүү;

-Окутуу жана тарбия усулун өркүндөтүү;

-Окуу жайлардын материалдык-техникалык базасын чыңдоого көмөк көрсөтүү.

Семинардын ачылышына Кыргызстан мусулмандарынын дин башкармалыгынын муфтийи Максатбек ажы Токтомушев, КРнын дин иштери боюнча комиссиясынын директору Орозбек Молдалиев жана Уламалар кеңешинин төрагасы Абдушүкүр Нарматов катышмакчы.