Кыргызстандын мамлекеттик чек араларын бекемдөөгө 55 миллион доллар багытталары айтылды

Кыргызстандын мамлекеттик чек араларын бекемдөөгө 55 миллион доллар багытталат. Бул тууралуу бүгүн, 26-ноябрда "Кыргызстан өз чек араларын коргой алабы?" деген аталыштагы тегерек столдун жүрүшүндө экономикалык адис Жумакадыр Акенеев билдирди.

Анын айтымында, акыркы үч жыл ичинде орусиялык, беларустук жана казакстандык адистер Кыргызстандын Бажы биримдигине киришинен соң кандай маселелер пайда болорун изилдеп чыгып, алардын алдын алууга тиешелүү чараларды көрүүнү сунушташкан. "Ушул мөөнөттүн ичинде Кыргызстандын жетекчилиги тарабынан террорчулук, аткезчилик, баңгизатты мыйзамсыз өткөрүүгө каршы иш-аракеттер жүргүзүлгөн",- деди Акенеев.

Мындан тышкары ал КРнын Президентинин аппаратынын тышкы саясат бөлүмүнүн башчысы Сапар Исаковго шилтеме берүү менен Орусия тарабынан Кыргызстанга 200 миллион доллар бөлүнөрүн эскертти. "Бул акча каражаттын 55 миллион доллары чек араларды бекемдөөгө багытталмакчы",- деп толуктады адис.