Камбар-Ата ГЭСи курулуп бүткөндө, ал Өзбекстанды суудан көз каранды кылып коюшу мүмкүн экендиги айтылды

Камбар-Ата ГЭСи курулуп бүткөндө, Өзбекстан суудан көз каранды болуп калышы мүмкүн. Бул тууралуу бүгүн, 26-ноябрда "Кыргызстан өз чек араларын коргой алабы?" деген тегерек столдун жүрүшүндө саясий серепчи Марс Сариев билдирди.

Анын айтымында, чек арадагы жаңжалдар Тажикстан жана Өзбекстанды жакындатып, Кыргызстанды алардын жалпы душманы кылууда. "Өзбекстан менен аныкталбаган мамлекеттик чек араларын чечүүдө саясий эрк керек. Анткени геосаясий көз караш маанилүү. Мисалы, Камбар-Ата ГЭСи чек араларды аныктоодо тоскоолдук жаратып жатат. Бул ишкананын үлүшүнүн жарымы Орусияныкы, жарымы Кыргызстандыкы. Ал курулуп бүткөндө, Өзбекстан суудан көз каранды болуп калат. Сугат суунун тартыштыгы аны чөгөлөтүп коюшу мүмкүн",- деди адис.