Бүгүн түнкүсүн жана эртең Бишкектин жана Чүйдүн айрым аймактарында электр жарыгы өчүрүлөт

Аба чубалгылары менен бир катар көмөк чордондорундагы оңдоо иштерине байланыштуу 28-ноябрда Бишкектин жана Чүйдүн айрым аймактарында электр жарыгы өчүрүлөт. Бул тууралуу "Түндүк электр" АККнын басма сөз кызматы билдирди.

Маалыматка ылайык, 27-ноябрдан 28-ноябрга караган түнү саат 00:00дөн 04:00гө чейин Бишкек шаарындагы Жибек Жолу-Ибраимов көчөсүнөн Жибек Жолу-Будённый көчөсүнө чейинки жана Жибек Жолу көчөсүнөн Осмонкул көчөсүнө чейинки барчаларда жарык өчөт.

28-ноябрда саат 10:00дөн 12:00гө чейин Скрябин көчөсүнөн Ахунбаев көчөсүнө чейин, Матросов көчөсүнөн Кара-Дарыя көчөсүнө чейин электр жарыгы үзгүлтүккө учурайт.

Саат 09:00дөн 17:00гө чейин Токтоналиев көчөсүндөгү №48-көп кабаттуу үйдө, Келечек, Мурас-Ордо конуштарында “Центральная-6” көмөк чордондорунда профилактикалык иштер жүргүзүлөт. Мындан сырткары үй ичиндеги тармактары, “Төмөнкү Ала-Арча” көмөк чордонунан тараган 10 кВт аба электр чубалгылары, “Атабаев” көмөк чордонунан тараган 6 кВт кабелдик чубалгылары оңдолот.

Чүй облусунун Аламүдүн районуна караштуу Байтик, Лесхоз, Озёрное, Рассвет, Ленинское (айланып өтмө жолдон мечитке чейин), Октябрьское (1-бөлүм), Виноградное, Полевое айылдарында, Теңдик, Келечек, Мурас-Ордо конуштарында, Жайыл районуна караштуу Кызыл-Дыйкан айылында, Сокулук районуна караштуу Гавриловка (Дружба, Забайкальская, Южная, Восточная, Фрунзе көч.) айылында, Шопоков (Футбольная, Машиностроительная, Мир, Фрунзе көч.) шаарында электр жарыгы үзгүлтүккө учурашы ыктымал.