Спирт ичимдиктерин жарнамалоого чектөө киргизүүчү мыйзам долбоору 3-окууда добуш берүүгө жиберилди

Бүгүн, 27-ноябрда Жогорку Кеңештин жыйынында депутаттар Дастан Бекешев сунуштаган алкоголдук продукцияны жарнамалоого чектөө киргизүү жөнүндө мыйзам долбоорун 3-окууда добуш берүүгө жиберишти. Мыйзам долбооруна ылайык, алкоголдук ичимдикти жарнамалоо убактысы кыскармакчы. Бекешевдин айтымында, учурда алкоголдук продукцияларды саат 22:00дөн баштап 06:00гө чейин жарнамалоого уруксат берилип келсе, жаңы мыйзам долбоорунда бул убакыт саат 00:00дөн 06:00гө чейин деп белгиленүүдө. Мыйзамды бузгандар үчүн айып пулдун төлөмү жогорулатылмакчы.

Мындан тышкары алкоголдук ичимдиктерди сатуучу кардарлардын жашы шек жараткан учурда сатуучу алардан паспорт талап кылат.