Депутат Нурлан Төрөбековдун кылмыш иши боюнча түзүлгөн комиссиянын отчётун угуу дагы бир жумага жылдырылды

Жогорку Кеңеш бүгүн, 27-ноябрда депутат Нурлан Төрөбековдун кылмыш иши боюнча түзүлгөн комиссиянын отчётун кароону кийинки аптага жылдырды. Мындай чечимдин кабыл алынышына депутаттын ооруп калып, жыйынга келе албаганы себеп болду. Жыйында кесиптеши Майрамкүл Тиленчиева: “Нурлан Төрөбековдун өзү ооруп жаткандыктан, бүгүнкү комиссиянын отчётун карабай эле коёлу. Биз маселени кароону жылдырууну суранабыз”,- деп билдирди.

Айта кетсек, башкы прокурор Аида Салянова Нурлан Төрөбековго карата жогорку билим жөнүндөгү жасалма дипломдун көчүрмөсүн колдонгондугу үчүн кылмыш ишин козгогон. Бул маселени иликтөө үчүн депутаттык комиссия түзүлүп, ага депутаттар Курманбек Дыйканбаев, Кантемир Мурзабеков, Райкан Төлөгөнов, Майрамкүл Тиленчиева, Мурадыл Мадеминов кирген.