Мамлекеттик салык кызматы салыктарды төлөбөгөн 15 компанияны аныктады

Кыргыз Республикасынын Мамлекеттик салык кызматы мыйзамсыз финансы жана салык пайдасын алуу максатында салык түзүүчү көрсөткүчтөрдү жашыруу менен байланышкан салыктарды төлөбөө тобокелдик факторлору бар 15 компанияны аныктады. Бул тууралуу бүгүн, 28-ноябрда аталган мекеменин басма сөз кызматынан билдиришти. 

"2014-жылдын июнь айында Мамлекеттик салык кызматы салыктарды төлөбөө тобокелдиктери бар 80 компаниянын тизмесин жарыялаган. Тобокелдиктер салык органдары тарабынан камералдык текшерүүлөрдү жүргүзүү учурунда аныкталган эле. Андан мурдараак, ушул жылдын апрель айында МСКнын башчысы Замирбек Осмонов аймактык салык органдарынын жетекчилеринен бир күндүк фирмаларга каршы келишүүсүз күрөшүүнү талап кылганын эске салабыз" деп айтылат маалыматта.

Салык кызматы тарабынан туруктуу негизде салыктарды төлөбөөнүн өтө чоң тобокелдиктери бар тармактар боюнча тыкыр талдоолор жүргүзүлүп жатканын белгилеп кетмекчибиз. Алардын жыйынтыктары боюнча тиешелүү текшерүүлөрдү жүргүзүү чечимдери кабыл алынат. Ал эми жалган ишмердик менен алектенүү белгилери бар субъекттердин бардык иштерине кылдат талдоолор жүргүзүлүп, жыйынтык материалдары тиешелүү чараларды кабыл алуу үчүн укук коргоо органдарына жиберилүүдө.