Бишкек мэриясы: Басып алынган жерлерди алып-сатуу күчөдү

Бишкектин аймагынан басып алынган жер тилкелерин алып-сатуу менен алектенген жарандардын саны күн сайын өсүүдө. Мэриянын маалыматына таянсак, Алтын-Казык конушундагы таштанды төгүлүүчү аймактын жерлерин алып-сатуу уланууда. Бишкек шаардык Жеке турак жай куруу департаменти аталган конуштун тургундарына өз алдынча басып алынган жерлерди сатып алуу жана кандайдыр бир курулуш баштоо мыйзамсыз экенин түшүндүрүүгө аракет кылып жатканы менен көрүнүш токтобой жатканы айтылууда. Департамент 11-ноябрда конуштагы курулуштар мыйзамсыз экенин, аймактан жер сатуу же сатып алууга болбой турганын эскерткен тактай орноткон. Бирок көп өтпөй аны бирөөлөр уурдап кетишкени кабарланды.