Жогорку Кеңеш кыргыз тилиндеги талаштуу жагдайлар боюнча атайын жыйын өткөрөт

Жогорку Кеңеш Ч.Айтматов атындагы Тил жана адабият институту менен биргеликте кыргыз тилинин абалы боюнча илимий конференция өткөрөт. "Кыргызстандын мыйзамдарындагы мамлекеттик тилдин маселелери" деп аталган жыйын 2015-жылдын 11-12-февралында өтүп, анда эне тилге тийиштүү мыйзамдар, кыргыз орфографиясындагы талаштуу учурлар, терминология, жаңы сөздөрдүн кошулушу, которуу ишинин кыйынчылыктары жана башкалар боюнча кеңири талкуу болот. Конференциянын максаты - кыргыз тилиндеги талаш туудурган жагдайларга парламент менен тилчилердин пикир алышуусунун алкагында илимий негиз издөө. Маалыматты бүгүн, 3-декабрда ЖКнын басма сөз кызматы билдирди.