Актилек Жумабек уулу атаандашын 1-раундда утуп, эр таймаш боюнча Дүйнөнүн чемпиондук куруна ээ болду

Бүгүн, 3-декабрда Бишкектеги Кожомкул атындагы Спорт Ордосунда эрежесиз эр уруштун “Эр таймаш ММА” түрүнөн Дүйнөлүк эр таймаш федерациясынын версиясы боюнча Дүйнөнүн жаңы чемпиону аныкталды. 75 килограмм салмакта бул курга ээлик кылып келген америкалык Шах Бобонис кыргызстандык спортчу Актилек Жумабек уулуна утулуп, чемпиондугун сактап кала алган жок. Беттеш болгону 1 раундга созулуп, Актилек атаандашын муунтуу ыкмасы менен жеңип алды. Алгач өзүнүн ыкчам кыймылы жана чапчаңдыгы менен айырмаланган америкалык спортчу Актилекти текшерип жатты. Бирок Актилектин маңдай талаштыра урган соккусу аны жерге кулоого мажбур кылды. А.Жумабек уулу дароо атаандашын басып алды да, муунтууга өттү. Эси оогон америкалыкты көрүп, калыс беттешти мөөнөтүнөн мурда токтотууга аргасыз болду.