Каржы министрлигинде бюджеттик ачык-айкындык боюнча семинар өттү

3-декабрда Каржы министрлигинин Окуу борборунда аталган министрликтин кызматкерлеринин жана жарандык коомдун өкүлдөрүнүн катышуусунда бюджеттик ачык-айкындык боюнча семинар өттү. Эксперт Чынара Маматова семинардын катышуучуларына бюджеттик ачык-айкындык стандарттары тууралуу маалымат берди. Анын айтымында, ачык-айкындык, жарандык коомдун бюджеттик процесске катышуусу, институттардын ортосунда функциялардын так бөлүштүрүлүшү, маалыматтын сапаты жана аныктыгы стандарттардын негизин аныктайт. Стандарттар боюнча төмөнкү негизги бюджеттик документтер коомчулук үчүн жеткиликтүү болууга тийиш:  

1. Алдын ала бюджеттик билдирме;

2. Бюджеттин долбоору;

3. Бекитилген бюджет;

4. Жарандык бюджет;

5. Бюджеттин аткарылышы жөнүндө ар айлык отчёттор;

6. Бюджеттин аткарылышы жөнүндө жарым жылдык сереп;

7. Бюджеттин аткарылышы жөнүндө жылдык отчёт;

8. Бюджеттин аткарылышын текшерүү жөнүндө отчёт.  

Эксперттер Эл аралык бюджеттик өнөктөштүк бюджеттин ачыктыгын изилдеп, 2006-жылдан баштап эки жылда бир жолу бюджеттин ачык-айкындык индексин жарыялап келе жатканын белгилешти.