Бишкекте "кримтөбөл" Камчы Көлбаев милицияга чакырылып, профилактикалык сүйлөшүүлөрдөн кийин коё берилди

Бишкекте "кримтөбөл" Камчы Көлбаев Райондук ички иштер башкармалыгына чакырылып, профилактикалык сүйлөшүүлөрдөн кийин коё берилди. Бул тууралуу бүгүн, 5-декабрда Бишкек ШИИББинин басма сөз кызматы билдирди.

Мындан бир жума мурун милиция кызматкерлерине оперативдүү маалымат келип түшкөн. Анда Бишкектеги ресторандардын биринде К.Көлбаевдин уюшкан кылмыштуу тобунун активдүү 3 мүчөсү жана Көлбаев өзү үй-бүлөсү менен тушоо тойго катышып жатканы айтылган. Ошол эле күнү күч органдары тарабынан аталган жерде 1976-жылы туулган С.Д., 1972-жылы туулган Б.У., 1981-жылы туулган К.Б. кармалып, Октябрь райондук ички иштер башкармалыгына жеткирилген. Ал жакта аты-жөнү такталып, профилактикалык иштерден соң коё берилген. Ал күнү Көлбаев ал жакта жок болгон. Эртеси ал да райондук ички иштер башкармалыгына чакырылып, профилактикалык сүйлөшүүлөр жүргөн.