Жогорку Кеңеш 2013-жылдын республикалык бюджетинин аткарылышын 3-окууда кабыл алды

Жогорку Кеңештин депутаттары 11-декабрда "2013-жылдын бюджетинин аткарылышы жөнүндө отчётту бекитүү тууралуу” мыйзам долбоорун талкуулап, 3-окууда кабыл алышты.

Маалыматка караганда, 2013-жылдагы республикалык бюджеттин негизги көрсөткүчтөрү төмөнкү деңгээлде бекитилген: 

Кирешелер - 90 миллиард 309 миллион сом; 

Чыгашалар - 96 миллиард 679 миллион сом;

Тартыштык - 6 миллиард 370 миллион сом. 

Ички дүң өнүм көлөмүнүн иш жүзүндө өсүшү 350 миллиард сомду түзгөн. Ал эми бюджеттин тартыштыгы 2 миллиард 834 миллион сомду түзгөн.

Талкуу жүрүшүндө депутаттар өздөрүн кызыктырган бир катар суроолорго жооп алышты. 2013-жылдын республикалык бюджетин аткаруудагы кемчиликтерди кийинки бюджеттик мезгилде кайталабоо тууралуу ой-пикирлерин айтышты.

Өкмөткө өлкө экономикасын жакшыртуу, бюджет тартибин так сактоо, мамлекеттик органдардын ишине көзөмөлдү күчөтүү, жоопкерчиликсиз аткаминерлерди жоопкерчиликке тартуу жаатында бир катар тапшырмалар берилди.