Президенттик сыйлыкка татыктуу спортчулардын тизмесин түзүүдө катачылык кетиргендерге сөгүш жарыяланды

Кыргызстанда президенттик сыйлыкка татыктуу спортчулардын тизмесин түзүүдө одоно катачылык кетиргендерге Дене тарбия жана спорт мамлекеттик агенттигинин директору тарабынан сөгүш жарыяланды. Бул тууралуу бүгүн, 17-декабрда аталган агенттиктен билдиришти.

Маалым болгондой, аталган агенттиктин башчысы Кадырбек Эргешов Борбордук аппараттын спорттук-массалык иш боюнча бөлүмүнүн башкы адиси Чыңгыз Искеновго жана ушул эле бөлүмдүн башчысы Канатбек Арпачиевге сөгүш жарыялады.

Мындан тышкары Мамлекеттик агенттиктин башчысы тарабынан премьер-министрдин атынан статс-катчысы Нуржан Бардиновага жана башчынын орун басары Болот Мотукеевге сөгүш жарыялоо сунушталды.

Эскерте кетсек, Кыргызстандын президентинин аппараты бүгүн, 17-декабрда президенттик сыйлыкты алуудагы спортчулардын тизмесиндеги одоно катачылык боюнча билдирүү жасаган.