Ош шаарында 11 айда сегиз миңден ашуун ымыркай төрөлгөн

Ош шаарынын вице-мэри Иличбек Эргешов шаардык кеңештин кезектеги сессиясында "2014-жылдын 11 айында 7863 төрөт болуп, 8003 ымыркай төрөлгөн" деп билдирди. Бул тууралуу 24-декабрда мэриянын басма сөз кызматынан маалымдашты. 

Анын айтымында, Саламаттыкты сактоо министрлигинин токтомуна ылайык, быйыл шаардагы төрөт үйү оор абалдагы кош бойлуу энелерди да кабыл алган. 

“2013-жылдын 11 айына салыштырганда төрөттүн саны 1392ге көбөйгөн. Жалпы төрөлгөндөрдүн ичинен 7984 ымыркай аман-эсен жарыкка келген. Ал эми жалпы төрөттүн 35,6 пайызын райондордон келип төрөгөн кош бойлуулар түзгөн. Өткөн жылдын 11 айына салыштырганда аман төрөлгөндөрдүн саны 1402 ымыркайга көбөйгөн”,- деди И.Эргешов.

Ошондой эле вице-мэр кошумчалагандай, Ош шаардык төрөт үйүндө өткөн жылга салыштырмалуу 2014-жылдын 11 айында энелердин операция жолу менен төрөшү 162ге кыскарган же былтыр 16,9 пайызы операция жолу менен төрөгөн болсо, быйыл 16 пайызды түзгөн.