Дайынсыз жоголгон малайзиялык экинчи учак деңиз түбүнөн изделиши мүмкүн

28-декабрда Индонезиядагы Сурабая шаарынан Сингапурга багыт алган малайзиялык учак дайынсыз жоголгон. Алдын ала берилген маалыматтарда учакта 162 адам болгону айтылган. "AirAsia" компаниясына тиешелүү Airbus A320-200 учагы кечээ саат 07:15 чамасында Сингапурга конмок. Байланыш үзүлгөндө издөө иштери башталып, караңгы киргенде токтотулган.

"Лайнер жарылып, сууга чөгүп кетти" деп божомолдогон индонезиялык куткаруучулар издөө иштерин деңиз түбүнөн улантууну айтып чыгышты. Бул тууралуу Индонезиядагы Издөө жана куткаруу улуттук агенттигинин башчысы Бамбанг Соэлистиого шилтеме берүү менен 29-декабрда чет элдик маалымат каражаттары жазып чыгышты.

"Бизге берилген координаттардан улам учак деңиз үстүндө кырсыкка кабылып, учурда суу астында болушу мүмкүн. Биздин өлкөдө суу астына кирип издөөгө, учакты көтөрүүгө керектүү жабдуулар жок",- дейт Соэлистио.

Ал эми аталган өлкөнүн вице-президенти Юсуф Калла дайынсыз болуп жаткан учак кулап түшкөнүн божомолдосо, "AirAsia" компаниясынын башчысы азырынча лайнердин жоголушу боюнча кандайдыр бир чечим чыгарбай, издөө иштеринин жыйынтыгын күтүп жатканын билдирген.

Эске салсак, 2014-жылдын 8-мартында Малайзиянын Куала-Лумпур аба майданынан Кытайдын Пекин шаарына сапар тарткан Боинг-777-200 учагы 239 жүргүнчүсү менен дайынсыз жоголгон. Издөө иштерине дүйнөнүн 30га чукул мамлекети киришип, жыйынтык чыкпай келет. Малайзия бийлиги учактын жүргүнчүлөрүнүн баары көз жумганы тууралуу билдирүү жасаган.