Кеминдеги жол кырсыгынан 2 адам каза болуп, 16 адам жабыркады

2014-жылдын 29-декабрында саат 15:15 чамасында Кемин районунда Бишкек-Торугарт жолунун 105-чакырымында Мерседес-Спринтер менен Лексус-RX-300 кагылышып кеткен. Натыйжада 2 адам каза болуп, 16 адам жабыркады. Бул тууралуу ӨКМнын басма сөз кызматы билдирди.

Маалыматка караганда, Мерседес-Спринтерди 1989-жылы туулган Азамат Жээнбаев башкарып, 24 жүргүнчүсү менен Чоң-Кеминге бара жаткан. Ал эми Лексус-RX-300 үлгүсүндөгү унааны Мелис уулу Насирдин айдап, 4 жүргүнчүсү менен Бишкек шаарынан бара жатып каршы тилкеге чыгып кеткен. 

Кырсык болгон жерден Лексустун жүргүнчүсү, 1942-жылы туулган Латипа Орозалиева каза болгон. Мындан сырткары 1967-жылы туулган Фатима Мусабаева аймактык ооруканадан көз жумган. 

Мерседес-Спринтер унаасынан 16 адам Кемин аймактык ооруканасына жеткирилген. 8 адам жеңил жаракат менен өз алдынча үйлөрүнө кетишкен. Куткаруучулар тарабынан биринчи жардам көрсөтүлгөн.