Америкада психикалык жактан ооруган бала Жаңы жыл күнү апасын балта менен чаап салды

АКШнын Флорида штатындагы Олдсмар шаарынын 23 жаштагы тургуну Жаңы жыл күнү үй иштерин жасоону буйруган апасын балта менен чаап салды. Бул тууралуу 2-январда чет элдик басылмалар жазып чыгышты.

Кристиан Хосе Гомес "адам өлтүрүү" беренеси менен айыпталып, суракка алынганда ал кылмышын моюнуна алган. Гомес 48 жаштагы апасы бош кутуларды чатырга алып чыгууну айтканда ачууланып, аны балта менен чаап салганын билдирген. Апасынын денесин таштанды төгүүчү чакага жашырып, велосипед менен качып бара жаткан жеринен кармалган. 

Маалыматка караганда, кылмышка шектүү 20 жашында "психикалык жактан ооруйт" деп каттоого алынган. Полиция кызматкерлеринин айтымында, сурак учурунда ал өзүн токтоо алып жүргөн жана апасын өлтүрүүнү пландап жүргөнүн айткан.