Ош. "Ажылык сапарга барууга жардам берем" деп алдап, 5 адамдан акча алган жаран кармалды

Ош шаарында алдамчылыкка шектелип 47 жаштагы жаран кармалды. Бул тууралуу Ош шаардык ички иштер башкармалыгынын басма сөз кызматы 7-январда билдирди.

Маалыматка караганда, милицияга 5 адам арыз менен кайрылган. Алар Я.Х. аттуу жаран "ажылык сапарга барууга жардам берем" деп убадалап, ар биринен 2500 доллардан акча алганын айтышкан. Жалпы 12 500 доллар акчаны алып, убадасын аткарбаганын билдиришкен.

Факты боюнча кылмыш иши козголуп, шектүү убактылуу кармоочу жайга киргизилди. Анын буга чейин 4 жолу соттолгону аныкталган. Ушул сыяктуу окуяларга туш болгон жарандар 0701 41-55-00, 0552 85-80-70 номурлары аркылуу Ош ШИИБине кайрылышса болот.