Футбол боюнча өлкө чемпиону “Дордой” курамына 150 миң еврого бааланган сербиялык легионерди кошуп алды

Бишкектик “Дордой” футболдук клубунун курамы сербиялык жарым коргоочу Периц Станчески менен толукталды. Германиялык “transfermarkt.de” басылмасынын маалыматы боюнча, футболчу 150 миң еврого бааланган. Бул тууралуу бүгүн, 8-январда аталган клубдун жаңы оюнчуларын жана 2015-жылга карата пландарын тааныштырууга багытталган жыйында белгилүү болду. 

Маалыматка ылайык, 29 жаштагы футболчу 28-номурдагы футболка менен оюн көрсөтөт. Ал кезинде Сербиянын жаштар курамасында ойноп, клубдук карьерасында “Борац Баня-Лука”, “Железничар” жана “Бежания” клубдарында оюн көрсөткөн. 

Кыргызстандын 2014-жылдагы чемпиондугун утуп, АФКнын Кубогуна жолдомо алган “Дордой” буга чейин Алмазбек Мирзалиев, Шерзод Шакиров, Кайрат Жыргалбек уулу жана Марат Ажиниязов сыяктуу футболчуларды курамына кошуп алган.

Кошумчалай кетсек, “Дордой” АФКнын Кубогунун тандап алуу турунда 9-февралда түркмөнстандык “Ахал” клубу менен кез келет.