Диаспора өкүлү 2015-жыл Орусиядагы мекендештер үчүн татаал башталгандыгын айтып берди

Бүгүн, 13-январда Орусиянын Бурятия Республикасынын Улан-Удэ шаарындагы кыргыз диаспорасынын кеңешчиси Алымбек Абжамилов SUPER.KG порталына кайрылып, 2015-жыл Орусиядагы мекендештер үчүн татаал башталгандыгын айтып берди.

"Жакында Бурятия республикалык миграция башкармалыгы 2014-жылга алынган патенттер 2015-жылдын акырына чейин жарактуу экенин билдирген. Бирок бүгүн барсак башканы айтышты. "Москвадан жаңы кагаз келди. 2015-жылдын 1-январынан баштап өткөн жылы патент алгандар дагы, акча төлөп койгондор дагы сөзсүз чыгып кетсин" деген жаңы түшүндүрмө келиптир",- деди мекендеш.

Ал өзү бул маселе боюнча тышкы иштер министринин вице-консулуна кайрылганда, чиновник кабарсыз экенин билдирген. "Мен ага түшүндүрүү иштерин жүргүзүү керек экенин айттым. Башка шаарлардагы кыргызстандыктар да муну (патент маселеси - ред.) билбеши мүмкүн",- деп толуктады Абжамилов.

"Айрым мекендештерибиз 12-январга чейин патент алгандар 3 ай үчүн төлөп алышкан. Ал деген 3648 рублду түзөт. Бирок анысы жарабайт экен. Эми биздикилер эмне кылууну билбей, сыртка да чыга албай калышты. Бизге жакынкы чек ара Монголия эле, Монголияга чыкканга паспорт керек. Анткени кыргызстандыктардын көбү ID-card менен жүрүшөт. Ал эми жалпы жарандык паспортторун (загранпаспорт - ред.) "апасынын сандыгына" салып коюшкан. Ошон үчүн эми чет өлкөгө жалпы жарандык паспорт менен гана чыгыш керек. КМШ өлкөлөрүнө ID-card менен кирип чыкканга болот дешти. Бул боюнча вице-консул менен сүйлөштүм. Бирок эң негизги нерсеси, Сахалин, Владивосток, Улан-Удэ, Чита шаарлары жана ошол жактагыларга өтө кыйын болот. Анткени Казакстандын чек арасынан өтүп келиш татаал маселе болуп калды",- деп түшүндүрдү мекендеш.