Өкмөт жооп берет: Эл аралык айдоочулук күбөлүгүмдө жарактуу мөөнөтү коюлбагандыктан, Москвада айып пул төлөп жатам, аны кантип алмаштырсам болот?

Урматтуу колдонуучу, сизде өкмөткө, ага тиешелүү министрликтерге берилүүчү суроолор жана чечилбеген маселелер барбы? Анда «Суперстандагы» «Өкмөт жооп берет» бөлүмүнө суроолоруңузду калтырыңыз. Суроолоруңузга тиешелүү тармактардын адистеринен жооп алып берүүгө даярбыз. 

Суроо: - Мен ноябрь айында Кыргызстандан эл аралык айдоочулук күбөлүк алып, Москва шаарына иштегенге кеткем. Азыркы тапта айдоочулук күбөлүктүн ичинде жарактуу мөөнөтү коюлбагандыктан, бул жактан айып пул төлөөгө аргасыз болуп жатам. Эл аралык күбөлүктү Кыргызстанга келип алмаштырып кетүү бир катар кыйынчылыктарды жаратууда, аны кантип алмаштырсам болот? Суроо калтырган stal.ks. 

Жооп: - Эгерде сиз Орусиянын жараны болсоңуз, эл аралык айдоочулук күбөлүктү Кыргызстанга келбей эле, ошол жактан алмаштырып алсаңыз болот. Эл аралык айдоочулук күбөлүк Орусиянын нормативине жараша алмаштырылат. Ал эми Кыргызстандын жараны болсоңуз, анда сиз сөзсүз түрдө бул жакка келип алмаштырышыңыз керек. Аны алмаштыруу үчүн КРнын Мамлекеттик каттоо кызматынын алдындагы Транспорттук каражаттарды каттоо жана айдоочулар курамы департаментине кайрылышыңыз керек. Эгер тиешелүү документтериңиздин баары жайында болсо, жаңы эл аралык айдоочулук күбөлүктү бир күндө эле алмаштырып ала аласыз. Айта кетчү нерсе, мындай эл аралык айдоочулук күбөлүктөр дүйнөлүк конвенцияда каралгандай, 10 жыл убакытка берилет.    

Суроого ИИМдин Жол-кайгуул кызматынын басма сөз катчысы Тилек Оторов жооп берди.  

Эгер сизде да суроолор болсо, анда "Өкмөт жооп берет" бөлүмүнө кириңиз.