Кардардын уулануусунан кийин Орусиядагы "Ысык-Көл" кафеси бир айга жабылды

Орусиянын Якутск шаарындагы Кальвица көчөсүндө жайгашкан "Ысык-Көл" кафесинде кардар ууланып, сот аткаруучулар аталган жайды бир айга жабышты. Бул тууралуу бүгүн, 15-январда Якутия Республикасынын Сот аткаруучулар кызматынын башкармалыгына шилтеме берүү менен орусиялык басылмалар жазып чыгышты.

Маалыматтарга ылайык, 2014-жылдын 18-ноябрында кардар аталган кафеде тамактанып, ууланган. 

"Мындан улам ал Орусиянын Кардарлардын укуктарын коргоо кызматына арыз менен кайрылган. Түшкөн арыздын негизинде санитардык инспекторлор "Ысык-Көл" кафесине текшерүү жүргүзүп, анда санитардык-гигиеналык талаптар бузулгандыгын аныкташкан",- деп жазышты басылмалар.

Мындан тышкары алар буга чейин аталган кафе ушул сыяктуу тартип бузуулардын кесепетинен өткөн жылдын август айында да жабылгандыгын эскертет.